عزيزى القارىء لا داعى لاندهاش عانس وافتخر

ممكن ناس كتير تستغرب لما تشوف العنوان والى ميعرفش يعرف انى انا عندى 20 سنة طيب تيجى منين 20 سنة وعانس انا ممكن اشرح لكم :

زمان اول مرة اسمع فيها كلمة عانس كانت عن احد الاقارب ولما قالوا كلمة :"عانس " قدامى استغربت وسألت عن معنى الكلمة قوللى معناها انها ما اتجوزتش !!!! "بس الكلمة دى عيب ومينفعش تنطقيها وبالذات قدمها " ساعتها سألت نفسى طيب يعنى هى الى متجوزتش يبقى عيب يعنى ولا ايه ؟؟!!

وبعدين اخذت على عاتقى انى لازم اتعرف على المفهوم ده واتوصل لحل , وبعدين لما سألت قالولى الى متجوزتش دى الى قطر الجواز فاتها ,( ايه قطر الجواز ده ؟؟؟ يعنى انا لو روحت محطة القطر واستنيت هناك حيجى القطر المخصص للزواج ولا ايه !!! ) هكذا درات الافكار فى عقلى

وبعدين مع نمو العقل بصورة طبيعية بدات الصورة توضح اكتر وبدات اسال نفسى متجوزتش يعنى غير محبوبة , غير مرغوبة , قبيحة , فيها حاجة غلط يعنى غير باقى بنات حوا برده مازلت مش فاهمة ليه متجوزتش وليه هو عيب اننا ننتعها بالعانس ؟؟!!

وقررت انى اعمل مقارنة وانى ادور على كل واحدة "عانس " حولينا واشوف مالها يعنى فيها ايه ناقص وا كتشفت انها عادى جدا بل بالعكس ممكن تكون متميزة كتير عن غيرها طيب ليه هى *متجوزتش ؟؟

وعدت السنين وكالعادة زى كل بنات حواء بيغرزوا فينا انى المستقبل المنتظر هو العريس والجواز والبيت "يارب اشوفك فى بيت عريسك " جملة بسمعها كتير اوى تقربيا من كل الى حوليا

وكبرت وانابحاول اقنع نفسى بأنى المستقبل هو فعلا زى ما بيقولوا وانى لازم اسستيم نفسى على كده (اعزورنى انى بتستخدم كلمة انجليزية معربة بس فعلا مالهاش اسم غير اننا لازم نظبط حياتنا زى الاجهزة الالكترونية بالظبط) يمكن يكون ده برده سبب لكون هناك مفهوم ومسمى للواحدة الى متجوزتش انها غربية عن قواعد وتفكير مجتمعها

نرجع مرجعونا للفظ العانس مع الوقت اكتشفت اد ايه هى كلمة تحرج وتوجع اى واحدة , ولما كبرت فهمت انه احساس مميت انى حد يعيش وحيد فى دينته ملوش ايه عزوة , محبش , و لااتحب , حاجات حلوة كتير ماتت جواه يمكن بدات احس ليه كلمة عانس عيب او بدات اعرف ازاى معناها موجع قد ايه

اما النقطة التانية وهى ليه بقت عانس وليه مافيش راجل بيسموه عانس اشمعنا البنت بس حتى لو عدى سن الاربعين ؟؟ مش لقيه اجابة لحد دلوقتى صراحة , يمكن يكون ده راجع لطبيعة مجتمعنا الذكورى بحت (مع العلم انى مش من انصار مساواة الرجل بالمرأة ولا من جمعية يا نساء العالم اتحدوا مجرد فكرة لحقيقة مجتمعية يمكن تكون السبب)

من وقت قريب بعد مناقشة حادة مع احد اصدقائى عن فكرة الجواز وانى رافضة تماما اسلوب الجواز التقليدى (جواز الصولونات كما يدعونه بالاسلوب العامى ) لانى بعتبره بيعة وشروه مش اكتر يعنى مجرد حد جى يشترى حاجة ويا تعجبه يا متعجبوش وعلى هذا بيكتبوا عقد بشروط بيع البيعة والثمن المحدد لها , طيب فين اودى عقلى وعلمى الى ربنا انعم عليا بيهم , انا مش معترضة على فكرة الجواز انها لحقيقة انى مافيش بنت فى الدنيا مش عايزة تتجوز ويكون ليها بيت واسرة واطفال وتكون محبوبة , بس اكيد مش بالاسلوب ده لمجرد انى انول اللقب ومابقاش عانس بعد عمر طويل "ده الجواز فرصة " ارفض تماما انى ابقى للبيع , يعنى اتنين مش يعرفوا بعض (ده على اقل الامثلة فى عمرهم ما شافوا بعض) يتفقوا اتفاقية تسمى زواج تشبه العقد لا والمشكلة انى الطرفين بيبقى عامل حسابه على كده فى حياته السابقة وبيعيش حياته وهو مدرك تماما انها مؤقتة عشان يبقى عاش اللحظة ,(يعنى محدش فيهم حرم نفسه من حاجة ) ارفض انى ابقى على النقيض مع نفسى

نرجع لمرجوعنا وفى نفس المناقشة السابق ذكرها سألتنى( بعد التوصل تماما انى رافضة تماما لفكرة انى الجواز فرصة ) وانى اكون صفقة (اعزورنى فى نتعى لها بالصفقة بعد تفكير طويل لم استطيع التوصل الا لهذا المفهوم) ,هل ممكن اتقبل لقب عانس فى يوم من الايام حقيقة انى مجبوتش فى وقتها واكتفيت بقول "الله اعلم " بس لما فكرت كتير اوى, دلوقتى اقدر اقول انى اتقبله تماما وبكل بفخر ان مكنتش الاقاى الشخص الى حيشاركنى حياتى ويقدر علمى وعقلى , يجعلنى حياته كلها واجعله كل حياتى , نبنى مع بعض كل حاجة سواء مادية ولا معنوية , يبقى ذو عقل وعلم , يحترم افكارى ويرعى فيا ربه , شخص اتمنى فعلا انه يكون اب مناسب لاولادى , وعدى بيا العمر .......................نعم انا عانس وافتخر