4:40am

الساعة 4:40 الفجر 29/5/2010 صليت الفجر ومش عايزة انام , حاولت اذاكر مقتدرتش ,مافيش حاجة فى دماغى , مسكت القلم وقولت حاكتب مع انى مافيش حاجة فى ذهنى للكتابة بس حاكتب والسلام

مش عارفة حالة غربية حاسها دلوقتى عايزة اضحك وحاسة انى محتاجة اشوف ناس كتير وفى نفس الوقت عايزة ابكى ,ابكى كتير اوى ومكلمش حد واكتأب وابعد عن كل الناس والدنيا , بيتردد فى ذهنى اغنية فيروز "يبكى ويضحك لا حزنا ولا فرحا " ........... وبعدين بقى فى الزهق ده

والى يغيظ انى عندى 8 مواد وكلهم بسم الله ماشاء الله مش محتاجين توصية ,بس حاسة بالزهق وساعات بالامبالاة

ساعات بحس بطمأنينة وانى مطمنة و راضية عن نفسى وساعات لا اوكتير لا ماهو كلنا بنحس باحساس عدم الرضا عن نفسنا , فعلا احنا ممكن نوصل لدرجة الكمال مع نفسنا ؟ طب هو ايه الكمال اصلا , هو موجود اصلا فى ديتنا , فعلا الكمال لله وحده , بس يمكن يكون شخص الكمال فى الدنيا متواجد فى التوزان, التوزان مع النفس , صح كده ,ويمكن غلط ,ماهو احنا فى الاول وفى الاخر بشر ...انسان جوانا خير وجوانا شر وكلنا غرائز و نفسنا مش بتبطل طلبات ...طب ماهو ممكن برده نعمل توزان فى كل حاجة ناخد من كل حاجه حاجة من غير مانغلط .......ياه حلم جمبل اوى وبعيد التوزان ده,دايما بقوله فى كلامى واحيانا بحس انى وصلته بس بيبقى كل فين وفين بعد تعب مميت وشاق مع نفسى عشان اوصل لاحساس ده , انا فعلا دلوقتى شايفه حلم جميل وبعيد .....يالله رحمتك الواسعة , رحمتك بيا يا رب

ماهو اكيد انا عارفة ايه هى الحاجات الى ملخبطة حياتى او يمكن الحاجة الى ابقى حاسبها هى الى ملخبطة تطلع هى الحقيقة وباقى سراب والعكس صحيح وليه لا ؟؟ , مابقتش عارفة حاجة , ادينى بكتب والسلام

.........كلام على ورق ..........ممكن برده

انا مابقتش عارفة انا عايزة اضحك ولا ابكى عشان كده بيقولوا على الشخص الى بيضحك ويبكى فى نفس الوقت مجنون , طب ما يمكن نفسه محتاجة لكده زى ما حاسة كده دلوقتى والاكيد انى مش اتجننت انا لسه بعقلى الحمد الله .......فى النهاية انا مش حاعمل حاجة غير انى اسكت ....لا تعليق ...لافعل لاى حاجة وحاقوم انام واحلم يمكن الاقى فى الحلم حاجة تريحنى .....ايوه انا متاكدة من رحمة ربنا

الف حاجة وحاجة بتدور فى دماغى , الف حلم وحلم يا ترى حاقدر احقق ده ولا عجلة الدنيا حتمشينى انا عارفة انى كل شىء بيحصلنا هو نصيب ومكتوب عند ربنا فى الاول وفى الاخر بس مش معنى كده اننا نتواكل .....ايوه انا مش حتواكل ومش حيأس ابدا وحافضل احاول واحاول مهما اقع يا رب قدرنى يارب

لحد وقت قريب كونت بلوم ناس كتير حوليا قريبين كانوا ولا مش قريبين انهم سابوا الدنيا تمشيهم و تشكلهم ومش ساهموا فى اى حاجة من حياتهم ودايما كونت بقول لنفسى انتى مختلفة وانى انا حابنى كل ركن فى حياتى سواء مادى ولا معنوى وحاتعب فيها اوى ماهو انا اتعودت انى لازم اتعب فى الحاجة اوى عشان احس انها بتعاتى ,ملكى ما هو انا مش بحب الحاجة الى بتجليى على الجاهز(وش فقر) ياه ادينى ضحكت اهو

نرجع مرجعونا للناس الى كونت بلوم عليهم بس فعلا دلوقتى انا عزراهم قد ما بلومهم ماهو الدنيا صعبة والحياة صعبة جدا والفرص ضعيفة وكتير مننا مافيش فى اديهم حاجة انا نفسى كتير بيجلى لحظات ضعف واستسلام

يارب قدرنى يا رب وقوينى

بدور على المثالية جوايا زمان كونت فاكرة انها سهلة بس هى صعبة اوى فى الحقيقة ......المثالية فى حد ذاتها تعتبر عيب من عيوب الانسان الى بيملوكها (اوعدنا يارب ) ايوه انك تبقى مثالى فى كل حاجة ده حلو وانك تعيش احساس النفس الطاهرة ده قمة الحاجات الحلوة (اللهم طهر انفسنا ) بس مش من حقك انك تحاسب الناس انها مش كده وتحسابهم على مبادئك (لاسف فى فترة من الفترات منذ وقت قريب كونت كده) بس لا طبعا البشر مختلفة

نهيته كفاية كتابة بقى انا حاقعد اسبح شوية وانام (ويارب احلم حلم جميل) 5:20 الفجر

تنويه :

الكلام ده انا كونت مقررة انى احرقه كالمصير من سبقوه من اخواته فى ظلمات الحرق بس قولت اديله فرصة فى الحياه

انا سميته 4:40 على اسم الوقت الى اتكتب فى الكلام ده لانه مش فيه موضوع معين

اقرؤا ذلك مع الاستماع الى نغمات فيروز http://www.youtube.com/watch?v=o7c_ZFrv4Y0