الخطيئة الكبرى

اعتقد انى فى فرق كبير بين الخطأ الفردى والخطأ الجماعى بمعنى اكتر انى فيه فرق بين انسان بيغلط فى حق نفسه واعتقد انه حر انه يعمل الى هو عايزه لانه فى النهاية حيتحاسب و بين أنسان بيغلط غلط جماعى بيغلط فى حق مجتمع بحاله 

بس لاسف المجتمع بيحاسب على النوع الاول بس مع انه ده غير ضار بأى حد غير بصحابه و مش بيحاسب حد بيأثر فى شغله ولا بيساهم فى تخربيب البلد اعتقد انى مدرس بيستغل مهنته عشان يتربح اكتر و يدى دروس ده كده بيضيع اجيال بحالها ولا دكتور بستغل اوجاع الناس للمتاجرة ولا تاجر بيتاجر باجتياجتهم ولا ولا ولا متعدش ....اعتقد انى دى الخطيئة الكبرى فى حق المجتمع والانسانية والله مش ببالغ بس فعلا ده من وجهة نظرى هى دى الخطايا الحقيقية الى المجتمع لازم يحاسب الناس عليها انا مالى انا ومال حد بيغلط فى حق نفسه ما يولع مع نفسه وانا مين عشان احاسب حد على خطايا فردية ربنا وحده الى بيحاسب 

انا ليا انى احاسبه على دوره الى الى بيعملوه من اجلى مهما اختلف دوره سواء كان صغير ولا كبير ...

المجتمع الى مش شايف الموظف الى بيرتشى ده مجرم و خاطى ولا شخصيات العاطفية الى شايفة مبارك وعصابته ملاك من السما و بيشتموا و بيناهضوا الناس الى ماتت عشان هما يعيشوا احسن وانهم زى الحرامية الى سرقوا ونهبوا البلد ووصلونا الى اسوء حال  انهم خاطئين و المهم عنده شوية مظاهر مكتوبة فى كتالوج الانسان المصرى ده مجتمع مريض ..

الخطيئة الكبرى انى حد يغلط فى حق اجيال بحالها و يضيع حق ناس انهم يعيشوا احسن 

حكرر تانى ابتداء من بواب العمارة لحد رئيس الجمهورية الى يقصر فى عمله و مهمته تجاه الانسانية هى دى الخطيئة الكبرى ومحدش من حقه انه يحاسب حد على  تصرفات فردية مش بتضر حد الا صحابها ولا حد من حقه يحاسب على مظاهر عشان يبقى فى نظر الناس الانسان السوبر 

احدى اجزاء ارهاصات الحديث مع الصديقة ميرال المصرى