Posts
من وانا صغيرة وانا مبحبش الارقام ابدا حتى كونت بليدة فى الرياضيات من صغرى ومعرفتش فى الفلوس غير لما دخلت المدرسة فى اول يوم مدرسة روحت للراجل بتاع الحاجة الحلوة وبشاور على الحاجة الى انا عايزها ساعتها طلب الفلوس وانا مكنتش فاهمة يعنى ايه (هو صحيح كانت ماما ساعتها حاتطلى الحاجات الحلوة بتاعتى فى الشطنة بس ده مينعش من الراجل بتاع الحاجة الحلوة برده) المهم نكمل الحكاية او بمعنى اصح المأساة انا بقى فضلت بليدة زى ما انا فى الرياضيات حتى عمرى ما عرفت احل القسمة المطولة ابدا و كونت بسرق الالة الحاسبة من ورا امى عشان احل بيها الواجب واطلع الناتج النهائى واحل على اساسه بس عمرى حلى ما طلع شبه الناتج النهائى ابدا ....
وتوالت الايام ووصلت لثانوية عامة وعقبال عندكوا جبت 32/50 فى الرياضة 1 فى تانية ثانوى وده كان قمة الابداع بالنسبة ليا انا والمهم وده برده بعيد عنكوا خلى مجموعى فى الارض
انا لحد دلوقتى مش بعرف احسب الباقى كام لما اشترى حاجة وبكسل اعد الباقى والفلوس ورا الرجال وبرميهم كده فى شنطتى و خالص
بس ياريتها جت على مجموع و قسمة و ضرب وشوية فكة
انا مش بحب الارقام فى حياتى و مش بعرف احسبها و بستغرب من الناس لما يقولوا الدهب ولا الماس و مش عارف ايه سوليتر انا بالنسبة ليا الفضة على سبيل المثال مجزية و بتبسطنى اوى بس دى خيبة قوية بعيد عنكوا
لييه كل الناس توزن الامور بالارقام يعنى كل الى تمنه غالى حلو والى تمنه رخيص وحش مع انه كتير بيبقى العكس ...يمكن انا بشوف كده عشان انا خيبة فى الحسابات و مش بعرف فيها ..يمكن الله اعلم
محدش يعرف يحسبهلى بالله عليكوا
No comments:
Post a Comment